هالة صدقي تعتذر عن المشاركة في مسرحية لمحمد صبحي لهذا السبب

وكالات- مصدر الإخبارية

تحدثت الفنانة المصرية هالة صدقي، عن أهمية المسرح والعروض المسرحية التي يتم تقديمها خلال الفترة الحالية.

وكشفت صدقي عن أنه كان من المقرر أن تشارك في مسرحية جديدة مع الفنان محمد صبحي، لكنها اعتذرت عنها لعدة أسباب.

وقالت خلال ندوتها على هامش فعاليات مهرجان الأقصر للسينما الإفريقية: “أنا عاشقة للمسرح، وكان في عروض مسرحية كتير الفترة اللي فاتت، لكن ده مش مسرح، أنا شايفة إنهم بيروحوا يعملوا اسكتشات، وفي جمهور للفن والفنانين المصريين”.

وتابعت: “مهم أوي نركز على إحنا بنقدم إيه في المسرح، وحلو إننا نستغل فرصة إن في جمهور عايز مسرح وحابب يتفرج علينا، بس الأهم إحنا هنقدم له إيه، ولما نعمل عرض يتعرض يومين ويجيب قرشين بس ده بيقفلك السكة اللي بعد كده”.

وأردفت: “لازم تثبت وجودك وتثبت فنك، وميكونش التفكير المادي هو نمرة واحد عندك، وأنت بتعمل مسرح، وللأسف في حالة من الاستسهال والتساهل الشديد جدًا موجودة دلوقتي، والمسرحية بقت بتتعمل في 3 و4 أيام، معرفش إزاي ده بيحصل، دي حاجة بتسئ لينا”.

وعن اعتذارها المشاركة في مسرحية لمحمد صبحي، قالت: “لما أعمل مسرحية لازم أعرضها شهر عشان المُشاهد ميحسش إني مش بحترم وقته وبقدم له سلعة مضروبة، ونفسي أرجع مسرح بس يكون مسرح صح، وبالنسبة لمسرحية محمد صبحي كان سبب اعتذاري عنها أولًا إن كان عندي ارتباط، ثانيًا المسرحية كانت كلها كوميدي ودوري أنا بس اللي كان تراجيدي”.

وأضافت هالة صدقي: “قولت لـ محمد صبحي أنا كدة هبقى نقطة ضعف في المسرحية، طبعًا أنا هموت واشتغل معاه بس اضطريت أرفض، عشان الناس لما تلاقيني أنا وهو مع بعض على الأفيش هيكونوا مستنين يدخلوا يضحكوا، وهيلاقوني تراجيدي وده هيأذي المسرحية مش هيفيدها”.

اقرأ/ي أيضًا: رامي صبري يستعد لإحياء حفل غنائي في السعودية