حابة أموت وربنا راضي عني.. زيزي عادل تعتزل الفن وترتدي الحجاب
وكالات- مصدر الإخبارية
أعلنت الفنانة المصرية زيزي عادل اعتزال الفن نهائيًا، موضحًة أن القرار تم اتخاذه منذ فترة طويلة ولكنها لم تعلنه من أجل منح نفسها فرصة للحوار مع المقربين منها، والهدف الأول من قرارها الابتعاد عن أكثر مغريات الحياة منها الشهرة والأضواء، وقائلًة: “أنا حابة أموت وربنا راضي عني”.
ونشرت زيزي صورة لها بالحجاب منذ ثلاثة أيام ضمن حملتها للترويج لألبومها الديني سيبها على الله، ولكنها باغتت الجميع فجر اليوم الثلاثاء بإعلان اعتزال الغناء، وظهرت عبر مقطع فيديو “بدون حجاب” عبر حسابها بموقع انستغرام، وبدأت كلامها قائلة: “أنا النهاردة طالعة أقول خبر مهم أخدته في حياتى وهو قرار اعتزالي”.
تابعت “قررت أسيب مهنة المطربة والقرار أنا مخدتهوش امبارح أنا وخداه من فترة كبيرة جدا، بس يمكن مطلعتش قلت وقتها لأنى كنت حابة أتكلم مع نفسى ومع الناس القريبة أوى.. الناس القريبة منى عارفين نفسهم ولما قلتلهم على القرار شجعونى ودعمونى كمان، ويمكن قرار الاعتزال ده بيبعدنى عن أكتر مغريات الحياة وهى الشهرة والأضواء”.
وأردفت “أنا ببعد عن الفن عشان بقرب من ربنا، والفترة اللى فاتت قربت من ربنا جدا، ولقيت ان القرآن بيقولى إنى لازم أكون ست ملتزمة، وبحاول على قد ما بقدر أكون ملتزمة وهتستغربوا شوية انى طالعة بشعرى ومش محجبة، ويمكن ده لأنى لسه ربنا لم ينعم عليا بالحجاب، وبدعى ربنا يتممها عليا، وكل حاجة بتيجى خطوة خطوة ومفيش حاجة بتيجى مرة واحدة”.
وأضافت “أنا عاوزة أقول كمان الفن هو مصدر دخلى ورزقى، وأنا بسيب حاجة بعيش منها وسيبتها وعارفة إن ربنا هيرزقنى، وأنا راضية جدا عن قرارى ومبسوطة جدا بيه وحابة اللى جاى جدا وحاسة إن حياتى اختلفت تماما.. يمكن لما أخدت القرار تعرضت لمواقف واللى تسمى اختبار من ربنا وكان اختبار صعب والإنسان ضعيف، لأن جالى عرض مجاليش وأنا بمارس مهنة الغناء، ولكن الحمد لله ربنا كرمنا وقدرت ارفض من دعم من ناس حواليا.. أنا مش عاوزة أدخل في حتة إن الفن حلال والفن حرام، عشان مبقاش طالعة إنى داعية أنا طالعة بتكلم عن نفسى، وإنى بطلت أغنى ودينى بيقولى كده وكل واحد حر في حياته”.
واختتمت زيز عادل قائلة: “أنا حابة أموت وربنا راضي عنى ويمكن دي حاجة كلنا بنتمناها، فأنا مش عارفة هاموت امتى ولكن كل اللي عوزاه أكون مستعدة لمقابلة ربنا وأقابله وأنا راضية عن نفسى وحياتي وأفعالي، والحمد لله ربنا كرمني والتزمت، وربنا يكرم التزم اكتر وادعولي بأن ربنا يثبتنى على اللي أنا فيه”.
اقرأ/ي أيضًا: ليلى غفران تتحدث عن سبب ابتعادها عن الفن منذ سنوات
